Хот байгуулалтын тухай хуулийг анх 1998 онд батлан мөрдүүлсэн бөгөөд уг хуулийг 2008 онд шинэчлэн найруулсан. Түүнээс хойш 4 удаа нэмэлт, өөрчлөлт орсон байна.
Хот байгуулалтын тухай хуулийн шинэчилсэн найруулгын төслийн зорилт нь Монгол Улсын хүн амын нутагшил, суурьшлын зохистой тогтолцоонд тулгуурлан хүн амын эрүүл, аюулгүй, таатай орчинд амьдрах, орчны бохирдол, байгалийн тэнцэл алдагдахаас сэргийлсэн, хүний амьдрах орчны чанарыг хангасан бүс нутаг, хот, суурин газрыг төлөвлөх, байгуулах, хэрэгжүүлэхтэй холбогдсон харилцааг зохицуулахад оршиж байгаа юм.
Энэ утгаараа Хот байгуулалт, хөгжлийн газрынхан Хот байгуулалтын тухай хуулийн шинэчилсэн найруулгын төслийг хэлэлцэж санал өгөх ажил хийгдэж байна.
Хууль зүй, дотоод хэргийн яамнаас Хот байгуулалтын тухай хуулийг бусад хууль тогтоомж, эрх зүйн акттай уялдуулах ажлын хүрээнд “Иргэн, эдийн засгийн хууль тогтоомжийн давхардал, зөрчил, хийдлийг арилгах, тэдгээрийн хоорондын уялдаа холбоог сайжруулах ажлыг хийх аргачлал”-д заасан шалгуурын дагуу уг хуулийн судалгаа хийгдэж, нийт 56 давхардал, хийдэл, зөрчил байна гэсэн дүгнэлт гарсан.
Сүүлийн 20 гаруй жил хотжих үйл явц эрчимтэй явагдаж, хот суурин газрыг чиглэсэн хүн амын шилжилт нэмэгдэж, нийслэл, бүсийн тулгуур төв болон аймгийн төв болох 23 хот, суурин газарт манай орны нийт хүн амын 60.0 гаруй хувь нь оршин сууж, үүнээс зөвхөн нийслэлд оршин суугчдын 1400 мянгад хүрч, ААНБ-ын 70 орчим хувь нь байрлаж байна.
