Налайх дүүрэг нь Улаанбаатар хотоос зүүн урагш 36 км зайд оршдог Нийслэлийн 9 дүүргийн нэг юм. Монгол Улсын авто замын босоо болон хэвтээ тэнхлэгийн огтлолцолд оршдог, авто зам, төмөр зам, агаарын тээвэр хөгжсөн, эрчим хүчний найдвартай эх үүсвэртэй, нийслэлийг цэвэр усаар хангаж байгаа дээд эх үүсвэртэй шууд холбогдсон, Нийслэлийн аялал жуулчлалын гол бүс нутагт хамаардаг, хүн амын дийлэнх олонхыг залуучууд болон хөдөлмөрийн насныхан эзэлдэг.
2015 онд Налайх дүүргийн иргэдийн санал асуулгын дагуу Нийслэлийн иргэдийн Төлөөлөгчдийн Хурлаас Нийслэлийн дагуул хот болгох шийдвэр гаргасан.
Тус дагуул хотын ерөнхий төлөвлөгөөг Нийслэлийн иргэдийн Төлөөлөгчдийн хурлын 2015 оны 28/14 дугаар тогтоолоор баталсан бөгөөд 2030 оны түвшинд 22 мянган өрхийн 77 мянган хүн амтай байхаар тооцож төлөвлөлтийн хугацаанд
- 16,373 суралцагчийн сургууль
- 5,243 хүүхдийн цэцэрлэг
- 565 ортой төрөлжсөн эмнэлэг
- 40 м2 нэг хүнд ноогдох ногоон байгууламж
- 94.7 км авто зам бий болохоор төлөвлөгдсөн.
Налайх дагуул хот нь дараах тэргүүлэх чиглэлийн хүрээнд үйл ажиллагаа явуулж Улаанбаатар хотын дагуул хот болон хөгжинө.
- Барилгын материалын үйлдвэрлэл технологийн парк
- Барилгын материалын бөөний худалдаа
- Тээвэр логистик
- Их дээд сургууль
- Жижиг дунд үйлдвэрлэл
